15 Lúnasa 2020 (Loch Garman)

Nuacht Mhall. Príomhscéalta na seachtaine, léite go mall.

Inniu an cúigiú lá dhéag de mhí Lúnasa. Is mise James McDonald.

Tá iarrthóir uachtaránacht Stáit Aontaithe Mheiriceá Joe Biden tar éis Kamala Harris a roghnú mar chomhiarrthóir. Má éiríonn leo i dtoghchán na huachtaránachta i mí na Samhna, beidh Harris ar an gcéad bhean dhubh a bheidh ina Leas-Uachtarán Mheiriceá. D'oibrigh an Seanadóir ó Chalifornia mar ionchúisitheoir dúiche sular ndeachaigh sí leis an bpolaitíocht.

Tosnóidh TG4 ag taifeadadh sraith nua den sobaldráma Ros na Rún gan mhoill. Ní raibh na haisteoirí agus an lucht léirithe in ann teacht le chéile i rith na gearchéime le déanaí. Ach beidh Trealamh Cosanta Pearsanta in úsáid acu ar an seit sa Spidéal chun an cúigiú séasúr is fiche a chur ar an teilifís an mhí seo chugainn tar éis cúig bliana is fiche ar an aer.

Bhris an aimsir an tseachtain seo tar éis tonn teasa in Éirinn agus sa Bhreatain le teocht níos airde ná tríocha céim, ach tar éis báistí troime bhí tuilte sa Bhreatain Bheag agus in Albain. Má fhanann an aimsir geal bíonn cith dreige Peirséais le feiceál sa spéir ag an am seo den bhliain. Má théann tú amach ar oíche gan scamaill agus gan solas na sráide, beidh tú in ann na dreigí a fheiceál ag soilsiú agus iad ag dul trí atmaisféar an domhain.

Léirithe ag Conradh na Gaeilge i Londain.