Talking about survival in Swiss German

The text below is the starting point for our discussion with Nadia on Monday at 9 pm

Contact me to arrange the lesson https://www.swiss-german-online.com/contact-us.html

 

Es git es paar Survival-Film, wo d Person, wo überlebt, ire Hund debii het. D Hünd sind det tröii Gefährte vo de letschte überlebende Einzelkämpfer. Im “Mad Max” isst de Mel Gibson alias Max sim Hund s Hundefuetter weg und im “I’m Legend” wird de Will Smith vo sim Hund vor de Zombies gwarnt.

Villicht git s drum uf eimol so villi Survival-Training für Hundebesitzer und iren Hund. Es schiint praktisch z sii, i Überlebenssituazione en Hund debii z ha, oder? Villicht chan er eim de Weg wiise, Fuetter finde, oder eifach nur Wärmi gäh.

I so Survival-Training mit Hund lernt mer über d Orientierig, mer schpürt Wasserquelle uf, suecht Fährte vo Wild und folgt ne, mer suecht essbari Pflanze, Chrüter und Wurzle, überwindet zäme Hindernis wie Bäum, Wasser und steili Felse, schwümmt langi Schtrecke und lernt wie mer e Notunterkunft für Mensch und Hund baut. S werdet au nöii Befehl glernt und bekannti werdet befeschtigt, mer übernachtet zäme dusse, im Zelt oder under em Tarp.

Bi somne Survival-Training mit em Hund, gseht mer, wie mer als Team funkzioniert. De Hund chönt allei im Wald überlebe, aber chöntisch du das au? Vom Tier cha mer vill lerne. Sini usgezeichnete Sinn chönd i Notsituazione nützlich sii. Urschprünglich het mer drum en Hund gha, zum sich chönne schütze und i verschidene Situazione Hilf z becho. I somne Training mues mer sich wider uf d Inschtinkt, s Buchgfühl und d Sinn verloh, dini eigene und die vom Hund. Mer lernt em Hund und sine usgezeichnete Fähikeite z vertraue. Aber mer achtet nid nur uf Details vom Hund, sondern au vo de Natur. Mer luegt gnauer hii, zum entdecke, was d Natur um ein ume z verschänke het.

So-nes Training wär mir und mim Hund eventuell au scho z Guet cho. Vorallem do in Costa Rica, git s e paar gföhrlichi Tier, wo eim oder de Hund chönd verletze. Min Hund isch mol vom-ene Ameisebär aagriffe worde. Aber so-nes Training und Campe im Urwald isch an und für sich villicht nid so e gueti Idee…

Froge:

Wie findsch du son es Survival-Training mit Hünd?

Wärsch du am ene Survival-Training mit oder ohni Hund intressiert?

Wiso?

Hesch sogar scho so-nes Training gmacht?

Bisch du scho mol «wild» irgendwo i de Natur go zälte, aso nid uf emene offizielle Campingplatz?

Verzell vo dinere Erfahrig!

Chöntisch du dich uf en Hund oder en anders Tier verloh?

Hesch du au scho mol en Hund gha?

Wenn jo, wie isch dini Beziehig zu ihm gsi?

Denksch, du chöntisch allei im Wald überlebe?

Hesch du dich bim Wandere scho mol verloffe?

Wenn jo, was hesch gmacht?

Verlohsch du dich uf dis Buchgfühl oder entscheidisch eher mit em Chopf?