”E Wiehnachtsaalass” Swiss German conversation class

30-day free trial https://app.swiss-german-online.com/subscriptions

 

E Wiehnachtsaalass

Di meischte Firme uf de ganze Welt organisiered e Wiehnachtsfiir oder e Wiehnachtsässe für iri Agschtellte. Bis geschter isch de letschte Wiehnachtsalass, wo-n-i ha dörfe teilnäh, vor öppe 4 Johr gsi, wo-n-i no a de Schprochschuel in Nosara gschaffet ha.

So en Aalass zeigt eme Agschtellte Wertschätzig und ladt ii zum fiire und au zum d Arbetskollege und di Vorgsetzte chli besser z kännelerne. Ich ha nur gueti Erinnerige.

Ich bi überrascht gsi, wo vor-ere Wuche min Partner mir seit, ich söll-i de 14. Dezember frei phalte. Drufabe han ich ihn gfrogt wiiso. Er het mer denn gseit, dass mir beidi iiglade sind zu de Wiehnachtsfiir vo Surfer Factory. Das isch d Firma, für welli er Surflekzione git. Au ich ha döt vor-eme Johr paar Surflekzione gäh. Das isch vermuetlich de Grund, wiso si mich au iiglade hend. En andere Grund chönnti sii, dass d Fründin vom Chef e Dütschi isch und ich ire glaub sympathisch bi 😊. Ich bi uf jede Fall total überrascht gsi.

Vor-eme Johr hend s nüt organisiert und i de Regel zeiged s de Agschtellte nid so vill Anerkennig, aber es isch schö, isch sich da chli am ändere. De Chef isch chli en komische und i sinere eigene Welt.

Will er wohrschinli nid so en gsellige isch, isch au dementschprechend s Lokal für de Wiehnachtsalass usgwählt worde: s Kino. Genau, mir sind am 14. Dezember alli mitenand im-ene private Kinosaal gsi. Zerscht het mer chönne Popcorn oder anderi Snäcks bschtelle und denn het d Nadine, d Fründin vom Chef, Bier und selbergmachte Glüehwii verteilt. Tönt e chli komisch: Glüehwii in Costa Rica, aber es isch ebe sehr chalt im Kino. Si chüeled immer extrem mit de Klimaaalag. Es het au Pizza gäh. Bald drufabe het de Film aagfange: de nöii Film Willy Wonka.

Es isch en schpezielle Film gsi, aber trotzdem hend mir de Obig gnosse. Am Schluss het mer no chönne vom vorige Bier und de vorige Pizzas öppis heinäh. Mir hend üs bedankt und so isch de Alass z Änd gange.

Froge:

Git s i dim Gschäft das Johr en Wiehnachtsalass?

Hend-er n scho gfiiret?

Verzell, was er gmacht hend oder wo-n-er gässe hend reschpektive wohi, dass ihr gönd?

Us wellne Gründ gfalled dir so Wiehnachtsfiire? Oder gfalled si dir nid?

Verschtohsch dich guet mit dine Vorgstetzte und Arbetskollege?

Git s en Wiehnachtsalass, wo dir bsundrigs in Erinnerig blibe isch, will er so schpeziell gsi isch? Verzell!

Gschpürsch du scho Wiehnachtsschtimmig?

Bis wenn muesch/dörfsch no schaffe?

Hesch öppis schpeziells plant über Wiehnachte/ Nöi Johr?

Gohsch du gern und oft is Kino?

Was isch de letschti Film, wo d im Kino gseh hesch?

Hesch vom Film Willy Wonka ghört, oder hesch en sogar gseh?

Was haltisch vom Film?